الجوكر سيطره !!!!

بسم الله الرحمن الرحيم

السيطره هكلم عن السيطره وحب السيطره وانا شايف انها بقت مرض كل واحد فينا دلوقتى بيحاول يفرض سيطرته على من هو اقل منه .

مش هقول زمان بس هقول من فتره كانت العلاقات قائمه بين الناس على الود والاحترام وحسن المعامله ...

اتعلمنا ان الكبير يحترم الصغير والصغير يحترم الكبير ..
دلوقتى عندنا فى المجتمع المصرى مبقاش فيه حاجه اسمها حسن معامله للاخر بالعكس بقى في سوء معامله فى كل حاجه حتى المعامله الادميه تكاد تكون انعدمت من فكرنا

كل واحد عنده منصب بيحاول السيطره على من اقل منه وبيفرض سيطرته عليه اقوال وافعال ..الانسان ده اللى وقع تحت سيطرة الغير بيحاول هو كمان فرض سيطرته على اللى اقل
منه نلاقى العميله بقت تبادليه كل واحد بيسطر على من هو اقل .
هضرب مثال بالمستشفيات واللى بجد شوفت فيها مناظر واحداث كتير .
تلاقى مدير المستشفى مسيطر على الدكتور والدكتور مسيطر على الممرض والممرض بقى بيدور على حد يفرض سيطرته عليه هيلاقى مين غير الناس مش بتفرق معاه كبير او صغير

راجل كبير يهينه امراءه يمطرها بالالفاظ الخارجه وعادى جداا .....راجل كبير فى السن وتعبان يورح المستشفى الساعه 3 بليل المفروض ان يبقى فيه رعايه له خاصة ان
التعب ظاهر عليه لكن للاسف ...الحوار اللى بيدور

زوجة الرجل الكبير : تسرع الى الممرض وتطلب مقابله الطبيب
الممرض : استنى شويه

الزوجه: استنى ايه يابنى الراجل هيموت ابوس ايدك شوفلى الدكتور
الممرض : الله مش قولتلك استنى يبقى تستنى

الزوجه :يابنى حرام عليكى
الممرض :هو ايه اللى حرام عليا اعملك ايه يعنى خليه يموت وريحينا
الزوجه:يموت !!! يابنى شوفلى الدكتور
الممرض :ماشى ماشى
تستنى الست شويه وهو قاعد بيهزر ولا اكن فيه حاجه وعادى جداا

تروحله تانى
الزوجه :يابنى بقولك الراجل تعبان شوفلى الدكتور
الممرض :انتى مش بتفهمى مش قولتلك شويه ومفيش دكاتره دلوقتى .
الرجل الكبير وهو عينه مليانه بالدمع والحزن والاسى على ماهو فيه ياله بينا زوجته تطلب منه الانتظار ولكن كبرياؤه يجبره على الخروج (يخرج وهو متمنى الموت )

وغيرها انا روحت مره ادفع فاتوره الكهرباء قالوا لى عند الاستاذ (محسن مثلا ) فى الدور ال4 اطلع الرابع يقولى عند استاذ محمد تحت انزل لمحمد يقولى عند منى اطلع لمنى لاقيها عماله تاكل وتقولى مش عندى
ولفيت على الموظفين كلهم وفى الاخر لما زهقت قولتله اكتب لى ورقه انك مش انت المسئول قالى نعم قولتله ايوه اعمل انا ايه انا لفيت على المصلحه دى فرد فرد وفى الاخر جه واحد بن حلال وقالى انت تبع منطقه ايه قولتله
قالى ان الموظف المسئول عنها مجاش النهارده !!!

فرض السيطره :
حتى فى التعليم صعب انك تلاقى المعامله بين التلميذ والاستاذ قائمه على الود والاحترام.
الكبير تلاقيه بيظلم الصغير
الغنى مسيطر سيطره تامه على الفقير وما اكثر الفقراء فى بلدنا .

ليه المعامله بينا مش قائمه على الود ؟

هل السبطره مرض ؟

كيف نقضى عليها ؟


$$الـــــجـــ الرايق ــــوكـــــر$$

والله موضوع جامد
ودا فعلا اللى بيحصل
بس دا من زمان وكل واحد صاحب نفوذ بيفرض سيطرته ع الاقل منه
فبيخلى الاقل يدور ع الاقل منه
ازاى نقضى عليها دى صعبه اصلها مش بالكلام لا انا ولا انت ولا اللى ع المنتدى كله يقدر ينهيها متهيقلى معظم ع المنتدى لسه طلاب مش احنا اللى بنفرض سيطرتنا ع حد

لازم يبقى فى عند الناس كلها او اللى غاويه تفرض سيطرتها ع الاقل منها رغبه انهم يتخلصوا من العاده دى
ودا صعب جدا......................

اولا مشكوره على المرور

احنا حاليا طلاب لكن بعد فتره ......

مش هنقضى عليها فى يوم ولا سنه ولا 5 سنين نقضى عليها بتربيه الاطفال على حسن معامله الغير على احترام الغير ... نعمل تقويم للشباب دلوقتى مش لازم للكبار بس على الاقل للموجودين حاليا

ربنا يدينا ويديك طول العمر
بس مش كل الناس هيعملوا كدا علشان فى ابن وزير وابن غفير
وادينا بنشوف فى الجامعه معامله ولاد الناس العاديين او الطبقه المتوسطه من الجامعه ومعامله ولاد رجال الاعمال والوزراء
واكيد مش كله هيستجيب للتقويم
وياترى التقويم دا على مستوى المنتدى دا
دا عايز توعيه كبيره فى التليفزيون وفى الجامعات وفى المدارس
متهيقلى دا محتاج ميزانيه تانيه ع الدوله ولو الكلام اتعرض ع اى هيئه متعقدش انه هياخد اهتمام لما يشغلوا الشباب يبقوا يقوموا بتوعيتهم

واضح انك متفائله جدااااا .,........ انا عارف ان كلامك نابع من الواقع اللى حوالينا ...بس برده لازم يبقى عندنا امل فى التغير امل اننا نبقى افضل ... مش شرط لينا احنا دلوقتى بكره يبقى عندنا اطفال والاب او الام بتشوف نفصها فى طفلها ...الاجيال العلاقه بينهم تكامل مش تنافر ....

مش لازم ننتظر الدوله كل واحد فينا يقدر يبنى ذاته بذاته لو كل اسره قومت ذاتها بمساعدة افردها هيتحقق ده .

مش مسأله تفاؤل انت عايش فى مصر وعارف
بس اللى اقصده مين ممكن هيفكر فى الكلام دا
دلوقتى انا وانت واللى ع المنتدى يعنى مسأله التوعيه ع مستوى محدود
لازم تاخد شكل اكبر من كدا
احنا بنتكلم فى 70 مليون
يعنى احنا واسرنا وولادنا نسبه قليله جدا منهم

انا فاهم قصدك وعارف انه صعب بس مش مستحيل والصعب نقدر نتعلب عليه

واكيد هيجى وقت ويتحقق ....... مش هنخسر حاجه لو فيه امل

كنت قريت جمله حلوه اوى على اعلان نوكيا متبطلشى تحلم علشان بكره يبقى احلى .
مش هنخسر لما نحلم ونتمنى

هو فعلا الموضوع دة مهم اوى وبيحصل للاسف فى الواقع وكويس انك اتكلمت عنه

فعلا المشكله دى محتاجه اننا نهتم بيها ونحلها وانا معاك يا محمود ان احنا لازم نبقى عندنا

تفائل وامل بس تفتكر ان التفائل والامل ده هيقدر يحل المشكله

لازم فعلا نعمل توعيه عالميه لازم نعرف الكبار اللى هما الاب والام عشان يعلموه لاطفالهم

واطفالهم يعرفوه ويعلموه لولادهم يعنى لازم الكبار والمسئولين يعرفوا ده

ويعملوا بيه ان الكبير يحترم الصغير والصغير يحترم الكبير ومحدش يستغل حد

ويسيطر على حد وللاسف احنا دلوقتى فى مشاكل كتير اوى عايزة تتحل

كتير من مبادئنا واخلاقنا بتتغير

ويااااااااااارب فعلا المشاكل دى تتحل بس ازاى ؟

اولا مشكوره على المرور

الحل اننا طبعا صعب اننا ننشر الافكار دى بين جميع الناس ونطبقها والمفروض الخطوه دى تيجى من جانب الاعلان لكن زى مادياما بقول ان الاعلان بتاعنا عقيم ...

نحاول احنا ننشرها فى اسرتنا ومع اصحابنا